|
Tute le matine verso le sete, porto a spasso el
me Red, un cagneto tanto bon solo in aparensa, e vedo rivar navi gigantesche, a
qindese, sedese ponti, longhe no so quanto. Le va a ormegiarse a la maritima: se
le vede che le sera tuto l'orizonte verso Mestre.
E tute le sere tra le sete e le oto e mesa, altra passegiatina igienica, e altra
rivista de le stesse navi de la matina che riparte.
Cossa portele? çinque, siemila viagiatori, che riva a le sete, i sbarca dopo
colassion a le nove, i gira par Venexia par tre quatro ore: cossa védeli?
Che i se ferma in qualche ristorante a tre, quatro, çinque stele (forse) o pur i
torna ai magnari omologai internassionali a bordo. Dopo, n'altra visitina a
Venexia de un per de ore, po dopo, tuti a bordo,e partensa.
Insoma, na gita artistica, cultural, aprofondia e acurata, completa de Venexia.
Mi me vergognaria ciamarlo turismo.
Se po ghe zontemo i dani tecnico idraulici atmosferici, che queli popò de
tafanari provoca, andemo de ben in megio.
|
|
Foto di Gianfry e commento di Gianfraball